* Tirza n lwali ɣer Ahnif d At Mansour

Tirza n lwali ɣer Ahnif d At Mansour

Ussan-a yezrin, Ali Bouguerra, lwali n Tubiret, yexdem yiwet n tirza ɣer tɣiwant n Ahnif d tin n At Mansour iwakken ad yerr tiṭ ɣer kra n yisenfaren n tdamsa. Di tazwara, yedla ɣer la station de pompage yellan deg At Mansour. Timacinin yellan da d tid i yettfeggiḍen le pétrole i d-yettasen srid si Hassi Messaoud, ɣer lluzin n usizdeg n Baraki akked Bgayet. Ayen i d-ijebden lwelha n umḍebber amezwaru n Tubiret d isem i yerran i la station-agi iwumi qqaren Beni Mansour. Ali Bouguerra yenwa ad as-yefk isem anasli “At Mansour”. Am wakken i d-yewɛed ad yazen i uneɣlaf n l’Energie et les mines yiwen n ukaram anda ara yessuter timanit i la station iwakken ur tettili ara d tin yurzen ɣer lluzinat n usizdeg n Bgayet neɣ n Baraki. D tikti yerfed yakan uselway n tɣiwant-a imi yezga yeccektay ɣef lixsas n tedrimt i ilaqen ad d-tekcem i tɣiwant.

Deg temnaḍt-agi daɣen, lwali n Tubiret yerza s Azrou Oukellal, yiwen n umkan anda ttilin yisenfaren Zone industrielle, anda yemlal d kra n yimɛelmen n lerzaq. Gar-asen imḍebber n le port n Bgayet, i yenwan ad yexdem deg umkan-a ayen iwumi neqqar le port sec. Iswi-ines ad yessixfef ɣef Bgayet taɛkemt n trusi n sselɛa. Γef wakken i nesla, 8 n yimɛelmen wejden ad sxedmen tadrimt-nsen deg waṭas n yisenfaren di tama-agi.

Di Ahnif, taɣiwant tis snat iɣer yerza Ali Bouguerra, yessefqed asenfar-nni n usufeɣ n taret, am wakken daɣen i d-tuli tikti n lebni n yiwet n lluzin iwumi neqqar placoplâtre deg yeɣzer umezyab i d-yezgan lewhi n unẓul n tɣiwant-a. Lluzin-a d win ara yesxedmen azal n 200 n yimdanen, melba wid ara yesfaydin s ubrid-nniḍen ama s usiweḍ neɣ lbiɛ n taret.

Deg umkan-a, imḍebber n Tubiret yegzem-itt di rray ɣef userreḥ n yiwen n ubrid ara yesdukklen Ahnif ɣer At Rached s wazal n 7 km ara d-yesqamen 5,6 imelyaren.

Uqbel ad tekfu tirza-agi, lwali yessuter seg yimḍebbren n tɣiwant-agi n Ahnif ad rren lwelha-nsen ɣer usenfar-agi n lebni n lluzin, daɣ ad ssemlilen imɛelmen d bab n wakal deg ussan i d-iteddun.

M. Smail